http://www.logosdictionary.org/pls/dictionary/new_dictionary.kdic.home?lang=en

http://www.logoslibrary.eu/sound/af/mp3/15649/antjie_somers_mix.mp3

AFRIKAANSE SPROKIES

Title: ANTJIE SOMERS ASCOLTA IN FORMATO

Die Mooiste Afrikaanse Sprokies
uitgesoek en oorvertel deur
PIETER W. GROBBELAAR

ANTJIE SOMERS
As paaiboelie het Antjie Somers geen gelyke in Afrikaans nie. “Oppas vir Antjie Somers. Hy sal jou in sy groot sak stop!" is 'n dreigement wat baie geslagte kinders soet gehou het. "Hy", ja, want Antjie Somers was natuurlik eintlik 'n man. Hier volg een van die talle maniere waarop die verhaal vertel word.
Andries Somers was 'n voorman onder die Strand se vissers. Wie kon soos hy 'n treknet vasvat? Wie 'n spaan met hom laat sak? Nee, niemand nie. En dapper! Waar iemand in gevaar gekom het, was Andries Somers eerste by. Nes ’n see-eend kon hy swem, en talle drenkelinge het hy land toe gebring as die ander al lankal moedverlore was.
Maar afguns is daar altyd, en skoorsoek is g'n kuns nie. Eendag op die strand pak 'n klomp vissers hom. Andries laat nie met hom speel nie. Hulle kantel voor sy vuiste. Maar een bly te stil lê waar sy kop 'n klip gevang het. Andries moet vlug, anders hang die mense hom dalk op. Hy kry 'n sisrok van sy suster. Hy bind 'n kopdoek om. Hy haak 'n mandjie oor sy arm. Toe kies hy koers, diep na die binneland.